Revelation of John 10
Tangada di langi mo di beebaa wini dulii
1Gei au ga mmada gi tuai dangada di langi maaloo e haneia i di langi. Mee nogo gahu i lodo di gololangi, gei di umada e haganiga dono libogo. Nia hadumada o maa e dina gi di laa, gei nia wae o maa e hai be nia duludulu ulaula. 2Mee dana beebaa wini dulii e mahuge i lodo dono lima. Mee ga dugu dono wae gau donu gi hongo di moana, ge dono wae gau ihala i hongo tenua, 3gei mee ga wolo dono lee gi nua gadoo be nia lee maaloo o nia laion. I muli hua dono wolowolo, gei nia atili e hidu ga helekai gi mee. 4Nadau madagoaa ne helekai, gei au ne belee hihi nnelekai digaula, gei au ga longono di lee e helekai mai di langi, “Haga mmuni ina nnelekai nia atili e hidu, hudee hihia gi lala!”5Tangada di langi ne mmada ginai au nogo duu i hongo di taimo tenua ga dahi aga dono lima gau donu gi di langi, a 6ga hagamodu i di ingoo o God, dela e mouli ga hana hua beelaa, dela ne hai di langi mo henuailala, di moana mo nia mee huogodoo i nadau lodo. Tangada di langi ga helekai, “Ma hagalee haga duai! 7Di madagoaa o togohidu dangada di langi ma ga ili dana ‘trumpet’, deelaa di madagoaa a God ga haga gila aga dana maanadu hagammuni, be dana haga iloo ang gi ana gau hai hegau, go nia soukohp.”
8Di lee dela ne hagalongo ginai au nogo helekai mai i di langi, ga helekai mai labelaa gi di au boloo, “Hana, kae ina di beebaa mahuge dela i lodo di lima tangada di langi dela e duu i hongo di tai mo tenua.” b 9Au ga hana gi tangada di langi deelaa, ga helekai gi mee bolo gi gaamai gi di au di beebaa wini dulii. Gei mee ga helekai mai, “Kae ina di maa, geina, gei di maa ga mmala i lodo doo dinae, gei di maa ga maangala be nia mee maangala i lodo doo ngudu.” 10Au ga kae di beebaa wini dulii i di lima o maa, ga gai, gei di maa e maangala be nia mee maangala i lodo dogu ngudu. I muli dagu holo di maa, gei di maa gu mmala i lodo dogu dinae. 11Mee ga helekai, “Goe e hai gi haga iloo labelaa nnelekai a God i di hai o nia mee e logo aanei: nia henua llauehe, nia hagadilinga daangada henua, nia hagadilinga helekai, mo nia king.”
Copyright information for
KPG